Konkani Kovita: "AZUNUIM........"

Konkani Kovita:

Azunuim……


Zill mill tond xitol varo fantteam parar
Suknni uton modur git gaitat boson zaddar
Ek supurlem pissollem guspon tona kordar
Azunuim bormeta nidon fulla pankllear


Dollem dovan bizleat toruim sopnam poitam
Tambddem mollob polleun pankam fapuddtam
Ratr sompon chandneachim zalim kobar voram
Azunuim dhara bond korun asant soglim goram



Gotteant vasru, xinga martalim eka meka
Xetkarim utton laglo soddunk gorvam daiam
Sogleo xeta kunngeo kosun kadleo galun zota
Punn! Azunuim xetant natt, nattunk nam..


Angnatleam parizatokak ful’leant sugandi fulla
Pormoll poddon gung zaleant soglim ghara,
Xellav varo marun zodtat soglim tim fulla
Fulla ektaupim azunuim nident asant bhurgim balla


Ratr sompon ximpodlim suriam kirnam
Rakneanim chorvak sodlim aplim gorvam
Dudkarn daran ubim dudachim geun aidonam
Punn! Dudh geupim azunuim uttonk nam.



Ratr somplim nid gelim konnakuch kobour nam
Ratrichim mouzam kitem kelem? khonn zanam?
Suknnim, zanvaram, utton kortat ap aplim kama
Punn! Munis matr azunuim nidentlom zagovnam!




Boroupi: MARIANO LUCAS DENIZ
(Palolem, Canacona/Kuwait)




- GOA-WORLD.COM
http://www.goa-world.com